“एक दिवस समाजासाठी!” — राजमानेतील अन्यायाविरोधात १५ जूनला विराट जनआक्रोश महामोर्चा; न्यायासाठी राज्यभरातील मांग गारुडी समाज एकवटणार!

दिनांक. 13 जून 2026. शनिवार. मालेगाव – निर्भीड जनता न्यूज नेटवर्क

पीडित कुटुंबांना न्याय, दोषींवर कठोर कारवाई आणि सुरक्षिततेची हमी देण्याची मागणी; समाजनेत्यांचे एकजुटीचे आवाहन

मालेगाव तालुक्यातील राजमाने गावात मांग गारुडी समाजातील काही कुटुंबांवर झालेला हल्ला, घरांची तोडफोड, संसारोपयोगी वस्तूंचे नुकसान आणि भीतीचे वातावरण निर्माण झाल्याने संपूर्ण राज्यातील मांग गारुडी समाजामध्ये तीव्र नाराजी व्यक्त होत आहे. या प्रकरणाची निष्पक्ष चौकशी करून दोषींवर कठोर कारवाई करावी, पीडित कुटुंबांना संरक्षण व न्याय द्यावा, या मागण्यांसाठी १५ जून २०२६ रोजी जनआक्रोश महामोर्चाचे आयोजन करण्यात आले आहे. समाजबांधवांच्या म्हणण्यानुसार, घटनेनंतर अनेक कुटुंबांमध्ये असुरक्षिततेची भावना निर्माण झाली असून महिलांमध्ये, ज्येष्ठ नागरिकांमध्ये आणि लहान मुलांमध्ये भीतीचे वातावरण आहे. या पार्श्वभूमीवर राज्यभरातील विविध सामाजिक कार्यकर्ते, समाजनेते आणि संघटनांनी एकत्र येत न्यायासाठी लढा उभारण्याचा निर्धार व्यक्त केला आहे.

अहिल्यानगर जिल्ह्यातील आश्वी बुद्रूक येथील मांग गारुडी समाजसेवक सचिन उपाध्ये यांनी राजमाने येथील घटनेबाबत तीव्र संताप व्यक्त करत म्हटले की, “राजमाने गावात आपल्या समाजातील कुटुंबांवर झालेल्या कथित हल्ल्याच्या घटना अत्यंत गंभीर आहेत. घरांची तोडफोड, महिलांना दिलेल्या धमक्या, लहान मुलांच्या मनात निर्माण झालेली भीती आणि कुटुंबांचे उद्ध्वस्त झालेले संसार हे कोणत्याही सुसंस्कृत समाजाला न शोभणारे चित्र आहे. मांग गारुडी समाज हा या देशाचा नागरिक आहे, संविधानाने दिलेल्या सर्व अधिकारांचा समान हक्कदार आहे. त्यामुळे कोणत्याही समाजबांधवाला भीतीच्या सावटाखाली जगण्यास भाग पाडले जाणार असेल, तर ते आम्ही कदापि सहन करणार नाही.

“ते पुढे म्हणाले,”आम्ही कोणाशी वैर मागत नाही, कोणाविरुद्ध द्वेष पसरवत नाही; पण न्यायाच्या प्रश्नावर तडजोडही करणार नाही. या प्रकरणाची निष्पक्ष चौकशी झाली पाहिजे, दोषींवर कठोर कायदेशीर कारवाई झाली पाहिजे आणि पीडित कुटुंबांना संरक्षण व न्याय मिळालाच पाहिजे. १५ जूनचा जनआक्रोश महामोर्चा हा कोणाविरोधातील आंदोलन नसून अन्यायाविरोधातील लोकशाही लढा आहे.”

“आज प्रत्येक समाजबांधवाने ‘एक दिवस समाजासाठी’ देण्याची गरज आहे. हा मोर्चा केवळ राजमाने गावासाठी नाही, तर भविष्यात कोणत्याही गरीब, वंचित आणि दुर्बल कुटुंबावर अन्याय होऊ नये यासाठी आहे. समाजाची एकजूट हीच आमची ताकद आहे आणि न्याय मिळेपर्यंत हा आवाज थांबणार नाही.”

समाजातील युवा नेतृत्व म्हणून ओळखले जाणारे दीपक लोंढे यांनी या प्रसंगी स्पष्ट शब्दांत सांगितले की,”आजचा प्रश्न केवळ राजमाने गावाचा नाही, तर न्याय, स्वाभिमान आणि अस्तित्वाचा आहे. मांग गारुडी समाजाने अनेक संकटे पाहिली, संघर्ष केला; पण अन्यायासमोर कधीही शरणागती पत्करली नाही. आम्ही कायद्यावर विश्वास ठेवतो, संविधानावर विश्वास ठेवतो आणि म्हणूनच न्यायासाठी लोकशाही मार्गाने लढत आहोत. समाजातील प्रत्येक युवक, प्रत्येक माता-भगिनी आणि प्रत्येक ज्येष्ठ नागरिकाने या लढ्यात सहभागी होणे ही काळाची गरज आहे. एकजूट हीच आमची सर्वात मोठी ताकद आहे आणि त्याच ताकदीच्या जोरावर आम्ही न्याय मिळवून दाखवू.”

दरम्यान, १५ जून रोजी होणाऱ्या जनआक्रोश महामोर्चाकडे आता राज्यभरातील मांग गारुडी समाजाचे लक्ष लागले असून, न्यायाच्या मागणीसाठी समाज मोठ्या प्रमाणावर एकत्र येणार असल्याचे चित्र दिसून येत आहे.

समाजनेते आदर्श उपाध्ये यांनी सांगितले की, “समाजावर होणाऱ्या अन्यायाविरोधात एकत्र येणे ही काळाची गरज आहे. न्यायाची लढाई रस्त्यावरची नाही, तर संविधानाच्या चौकटीतील आहे. त्यामुळे युवकांनी पुढे येऊन समाजाच्या हक्कांसाठी संघटितपणे उभे राहिले पाहिजे. हा मोर्चा केवळ निषेधासाठी नसून समाजाच्या स्वाभिमानाचा आवाज आहे.”

ज्येष्ठ समाजनेते नेवालाल पात्रे यांनी सांगितले की, “कोणत्याही समाजावर अन्याय होणे ही लोकशाहीसाठी चिंतेची बाब आहे. राजमानेतील घटनेची सत्यता निष्पक्ष चौकशीतून समोर आली पाहिजे आणि पीडितांना त्वरित न्याय मिळाला पाहिजे. समाजातील प्रत्येक घटकाने संयम राखून संविधानिक मार्गाने आपली भूमिका मांडणे आवश्यक आहे. हा मोर्चा न्याय, स्वाभिमान आणि सामाजिक एकतेचा संदेश देणारा ठरेल.”

दिगंबर सकट यांनी सांगितले की, “राजमानेतील घटनेमुळे राज्यभरातील समाजबांधवांच्या भावना दुखावल्या गेल्या आहेत. पीडितांना न्याय मिळवून देणे आणि भविष्यात अशा घटना पुन्हा घडू नयेत यासाठी हा महामोर्चा आयोजित करण्यात आला आहे. समाजाने मोठ्या संख्येने सहभागी होऊन एकतेची ताकद दाखवून द्यावी.”

दिनांक : १५ जून २०२६ वेळ : सकाळी ११.०० वाजता. स्थळ : डॉ. बाबासाहेब आंबेडकर पुतळा ते प्रांत कार्यालय, मालेगाव (जि. नाशिक). महामोर्चामध्ये महाराष्ट्रातील विविध जिल्ह्यांमधून समाजबांधव, सामाजिक कार्यकर्ते, युवक, महिला आणि ज्येष्ठ नागरिक सहभागी होणार असल्याची माहिती आयोजकांनी दिली आहे.