दिनांक.17 जून 2026. सोमवार. मालेगाव – निर्भीड जनता न्यूज नेटवर्क.
पीडित कुटुंबांना न्याय, दोषींवर कठोर कारवाई आणि सुरक्षिततेची हमी देण्याची मागणी; राज्यभरातील मांग गारुडी समाजाची ऐतिहासिक एकजूट
मालेगाव तालुक्यातील राजमाने गावात मांग गारुडी समाजातील कुटुंबांवर झालेल्या कथित अन्याय, घरांची तोडफोड, संसारोपयोगी वस्तूंचे नुकसान आणि निर्माण झालेल्या भीतीच्या वातावरणाच्या निषेधार्थ सोमवार, दिनांक १५ जून २०२६ रोजी काढण्यात आलेला विराट जनआक्रोश महामोर्चा उत्स्फूर्त प्रतिसादात आणि शांततेत पार पडला. या मोर्चानंतर जिल्हाधिकाऱ्यांना निवेदन सादर करून पीडित कुटुंबांना न्याय मिळवून देण्याची मागणी करण्यात आली.
डॉ.बाबासाहेब आंबेडकर स्मारक येथून सुरू झालेल्या या महामोर्चामध्ये राज्याच्या विविध भागांतून आलेले मांग गारुडी समाजबांधव, महिला, युवक, ज्येष्ठ नागरिक आणि विविध सामाजिक संघटनांचे पदाधिकारी मोठ्या संख्येने सहभागी झाले होते. “जय शिबारी”, “जय भीम”, “जय लहूजी”; “जय संविधान” आणि न्यायाच्या घोषणांनी परिसर दणाणून गेला होता.
राजमाने गावातील घटनेमुळे समाजामध्ये तीव्र संताप व्यक्त होत असून, या संपूर्ण प्रकरणाची निष्पक्ष चौकशी करून दोषींवर कठोर कायदेशीर कारवाई करण्यात यावी, अशी प्रमुख मागणी यावेळी करण्यात आली. तसेच पीडित कुटुंबांना संरक्षण, नुकसानभरपाई आणि आवश्यक मदत देण्याची मागणीही निवेदनाद्वारे प्रशासनाकडे करण्यात आली.
यावेळी उपस्थित समस्त समाजबांधवांनी आपल्या मनोगतात सांगितले की, हा संघर्ष कोणत्याही व्यक्तीविरोधात नसून अन्यायाविरोधात आहे. मांग गारुडी समाज संविधानावर आणि लोकशाही व्यवस्थेवर विश्वास ठेवतो. त्यामुळे न्यायाच्या मागणीसाठी समाज संविधानिक आणि लोकशाही मार्गाने लढा देत आहे. समाजातील कोणत्याही कुटुंबावर अन्याय झाल्यास संपूर्ण समाज त्यांच्या पाठीशी खंबीरपणे उभा राहील, असा निर्धार व्यक्त करण्यात आला.
समाजबांधवांनी असेही मत व्यक्त केले की, राजमानेतील पीडित कुटुंबांच्या डोळ्यांतील अश्रू पुसण्यासाठी आणि त्यांना न्याय मिळवून देण्यासाठी समाज एकजुटीने उभा राहिला आहे. हा मोर्चा केवळ एका गावापुरता मर्यादित नसून समाजातील प्रत्येक वंचित, दुर्बल आणि पीडित कुटुंबाच्या न्यायाच्या हक्कासाठीचा आवाज आहे. मोर्चाच्या समारोपानंतर प्रतिनिधी मंडळाने जिल्हाधिकाऱ्यांना निवेदन सादर केले. निवेदनामध्ये राजमाने प्रकरणाची सखोल चौकशी, दोषींवर कठोर कारवाई, पीडित कुटुंबांना संरक्षण, आर्थिक मदत आणि कायमस्वरूपी सुरक्षिततेची हमी देण्याची मागणी करण्यात आली.
समस्त समाजबांधवांच्या वतीने यावेळी सांगण्यात आले की, न्याय मिळेपर्यंत हा लढा थांबणार नाही. समाजाची एकजूट, स्वाभिमान आणि संविधानिक हक्कांचे रक्षण करण्यासाठी प्रत्येक समाजबांधव कटिबद्ध आहे. १५ जून रोजी झालेला हा महामोर्चा मांग गारुडी समाजाच्या इतिहासातील एक महत्त्वाचा टप्पा ठरला असून, समाजाच्या संघटित शक्तीचे दर्शन घडवणारा ठरला आहे. राजमाने प्रकरणानंतर राज्यभरातून मिळालेला प्रतिसाद आणि महामोर्चामध्ये झालेला मोठा सहभाग यामुळे समाजाच्या न्यायासाठीच्या लढ्याला नवे बळ मिळाल्याची भावना उपस्थितांनी व्यक्त केली.
“एक दिवस समाजासाठी दिला… आणि समाज न्यायासाठी एकवटला!”या घोषवाक्यासह हजारो समाजबांधवांनी न्याय, स्वाभिमान आणि संविधानिक हक्कांसाठी एकजुटीचा निर्धार व्यक्त केला.