शिर्डी : निर्भीड जनता न्यूज नेटवर्क
श्री सच्चिदानंद सदगुरु साईनाथ महाराज की जय !
आज अहिल्यानगर जिल्ह्यातील शिर्डी शहर पुन्हा एकदा राजकीय व धार्मिक रंगात न्हाऊन निघाले, कारण केंद्रीय गृह आणि सहकार मंत्री अमितभाई शाह यांनी शिर्डी येथे येऊन श्री साईबाबांच्या समाधीचे दर्शन घेतले. या प्रसंगी त्यांनी साईचरणी लीन होत महाराष्ट्र व देशाच्या कल्याणासाठी प्रार्थना केली.
यावेळी त्यांच्यासोबत मुख्यमंत्री देवेंद्र फडणवीस, उपमुख्यमंत्री अजित पवार, जलसंपदा मंत्री राधाकृष्ण विखे पाटील, ऊर्जा मंत्री चंद्रशेखर बावनकुळे, मंत्री पंकजा मुंडे आणि भाजप प्रदेशाध्यक्ष रवींद्र चव्हाण आदी मान्यवर उपस्थित होते.
शिर्डी मंदिर परिसरात या सर्व मान्यवरांच्या आगमनानंतर वातावरण भक्तिमय आणि उत्साही झाले होते. मंदिर समितीच्या वतीने अमित शाह यांचे स्वागत करण्यात आले. त्यांनी श्री साईबाबांच्या मूर्तीसमोर दीपप्रज्वलन करून पूजा-अर्चा केली. मंदिरात दर्शन घेतल्यानंतर त्यांनी परिसरातील साधू, भक्त आणि उपस्थित नागरिकांना शुभेच्छा दिल्या.
या भेटीदरम्यान त्यांनी मंदिरातील स्वच्छता, भक्त व्यवस्थापन, आणि सुरक्षेच्या उपाययोजनांचा आढावा घेतला. तसेच, शिर्डीच्या सर्वांगीण विकासासाठी केंद्र सरकारकडून सहकार्य दिले जाईल, असे आश्वासनही त्यांनी स्थानिक प्रशासनाला दिले.दरम्यान, साईबाबांच्या दर्शनानंतर अमित शाह हे अहिल्यानगर जिल्ह्यातील विविध कार्यक्रमांना उपस्थित राहणार असून, यामध्ये शेतकरी सक्षमीकरण आणि सहकार क्षेत्रातील विकास प्रकल्पांचा समावेश आहे.शिर्डीत आज दिवसभर भक्तांची मोठी गर्दी पाहायला मिळाली. अनेकांनी “साईनाथ महाराज की जय!” या घोषणांनी परिसर दुमदुमवला.
